oximoron por solución

instagram

pouco pode durar a sensación de certa vitoria no caso das fragas de Catasós. O único favorable é o tempo cautelar que se gaña antes de que Fenosa (Gas Natural) comece finalmente a construír a liña de alta tensión. As alternativas, polo de pronto, xa se aventuran coma unha ‘non solución’. Se as supostas negociacións ‘ao máis alto nivel’, que cabe lembrar resultaron só posibles tras o enfado popular e o toque de atención aos que fan política desde as institucións, acaban só por propoñer a aparencia como solución, pois o resultado é totalmente insatisfactorio: a medida para protexer a fraga pasará por un novo deseño que afectará igualmente a fraga.

unha rápida revisión do ‘regulamento de liñas eléctricas de alta tensión’ lévanos a ver que, alá por onde pase calquera liña, quedará afectada obrigatoriamente unha servidume de paso a efectos de seguridade: ‘para evitar as interrupcións de servizo e os posibles lumes producidos polo contacto de ramas de troncos cos condutores dentro dunha liña eléctrica aérea, deberá establecerse mediante a indemnizacións correspondente, unha zona de protección da liña cuxa anchura será definida pola proxección sobre o terreo dos condutores extremos e das súas cadeas de illantes …’

fraga de Casas Vellas
www.lavozdegalicia.es

tamén recolle o regulamento que o responsable da explotación da liña: a/ estará obrigado a garantir as distancias coa masa de arborado  dentro da zona de servidume, estando obrigado o propietario do terreo a permitilo;

b/ deberá vixiar tamén que o corredor por onde pasa a liña manterase libre de todo residuo procedente da súa limpeza, ao obxecto de evitar a xeración ou propagación de lumes forestais.

en definitiva, dúas alternativas que teñen por solución a non solución do problema. Nestes momentos as fermosas fragas, coas súas árbores centenarias, continúan igual de ameazadas que antes do venres.

e para rematar dous datos. primeiro, o conxunto do que estamos a falar é dun altísimo valor ecolóxico e algúns exemplares son case únicos.

segundo, Gas Natural, a megaempresa promotora da liña de alta tensión acaba de lanzar unha OPA de 2600 millóns en Chile para facerse cunha compañía eléctrica local e din que non teñen 4 para soterrar esta liña.

valoren vostedes os datos e vexan e oigan o último 'spot' publicitario da empresa, ese onde din 'la energía que piensa'. a saber en que pensan.

MARTIÑO NERCELLAS