Piscina de Lalín: de mal en peor

Cando reabran as piscinas de Lalín neste 2014, os usuarios pasaremos de pagar 2,30 euros a 5 euros pola entrada individual. Unha suba do 117%; é dicir, o dobre e un 17% máis de propina. Non está mal para comezarmos o ano nestes tempos de crise. Seguramente isto non sexa máis que a consecuencia dunha serie de erros que se veñen sucedendo na xestión e planificación das instalacións deportivas, nomeadamente da piscina.

Os usuarios da piscina nunca entenderemos porque se decidiu prescindir da piscina do Pontiñas; unha piscina que estaba en pleno uso, nun edificio de calidade superior ao actual. Situado no mesmo casco de Lalín nunha zona que habilitaba a xestión conxunta de piscina exterior e que permitía aos alumnos dos colexios e os institutos iren a natación como actividade complementaria. Agora a dita actividade cesou por completo debido a situación da nova piscina. Unha piscina que era tamén nova (ano 95), máis grande, con bancadas e apta para competicións oficiais (a actual non). Que en todo caso o único que precisaba era algunha reforma ou reparación para seguir plenamente operativa. Desde logo un investimento sempre moi inferior aos 1,5 millóns de euros gastados na piscina actual. Mais aquí o que se decide de xeito inexplicábel (e inexplicado) é prescindir destas instalacións e anunciar a súa demolición (Disque para a nova biblioteca, ah, pero esa non ía no Castro Tecnoloxico, ... )

Trala inauguración da nova piscina outros problemas comezan, a baixa calidade da construción ponse en evidencia axiña coa aparición de humidades e pingueiras aos poucos meses da súa apertura. E como as cousas aínda poden ir a peor, neste ano aos usuarios da piscina tócanos pagar as consecuencias de toda esa planificación errática. Resulta que agora xa non podemos elixir ser abonados só da piscina, obrígannos a ser abonados de todo o conxunto do Lalín Arena: piscina, ximnasio e spa. Todo no mesmo paquete. Isto nin é lóxico nin xusto porque hai moitos usuarios que non queren, ou non poden, usar todas as instalacións. E por tanto o abono conxunto non supón ningunha vantaxe, senón un gravame. Hai persoas que pola idade ou pola súa condición física non poden facer determinadas actividades. Por exemplo, as persoas con varices non poden ir ao spa ou a sauna. Entón, por que teñen que pagalas? E como este hai moitos mais casos e razóns.

Agora as contas non saen. E como ven que non hai para pagar tanta obra, algunha totalmente innecesaria, como o caso da piscina, pois hai que sacar os cartos dalgún lado. E xa sabemos a quen nos toca pagar. Somos moitos os usuarios afectados e indignados pola situación que se creou. Os erros e as improvisacións sucédense e aínda está por ver o efecto que van comportar estas novas regras e tarifas no uso da piscina municipal.

texto escrito por Luis Couto, usuario da piscina de Lalín, e publicado en Faro de Vigo (edición Deza - Tabeirós) o 8 de xaneiro de 2014