Lalín INDA non é Gamonal

efectos do vendaval na sinaléctica
do Agro de Lalín de Arriba

a pesar dos esforzos municipais por ‘internacionalizar’ o Cocido por toda España, non creo que en Gamonal (Burgos) saiban onde está Lalín pero estes días aquí si sabemos de alí; polo parte.

logo de días de intenso conflito, o alcalde de Burgos anunciou o martes que suspende temporalmente as obras proxectadas para transformar unha rúa ‘de sempre’ nun moderno ‘boulevard’. A cousa estaba tomando mala pinta e debeu recibir algunha chamada. Veremos que pasa no futuro, porque nin uns nin outros renunciarán de xeito doado aos seus intereses.

Gamonal non é a primeira vez que logra paralizar unha decisión municipal coa que non concorda. E vai camiño de converterse nun símbolo da reacción cidadá contra as arbitrariedades (cando menos) dalgúns políticos que exercen un poder democrático si, pero que muda en autoritario unha vez que gañan as eleccións correspondentes.

e iso a pesar dos intentos de presentar os lexítimos discrepantes e a súa mobilización, maiormente respectuosa e democrática, como demos perversos; por exemplo, clarividente, a sr. Botella condenou os ‘atentados’ de Burgos, transformando as asociacións veciñais nunha banda criminal organizada.

o motor desta ‘revolta’ non é o mal senón que a xente do barrio non cre que modernizar a rúa ‘Victoria’ sexa unha prioridade, ven outra obra ‘faraónica’ que non lles vai solucionar os seus problemas: a taxa de paro elevada, os servizos públicos cada vez máis precarios. Sospeitan que recibirán unha vida con maior aparencia pero menor calidade, máis cara, máis inaccesible. Quizás oíron falar dos aeroportos sen avións e das autoestradas sen coches: malgasto flagrante e o interese dalgún construtor.

consideran que os cartos se gastarían mellor cubrindo necesidades máis importantes: pagar unha escola infantil, fomentar o emprego nos colectivos que sofren a lacra do paro, dotar mellor os centros de ensino, reforzar a asistencia médica, apoiar os dependentes e as súas familias.

en Lalín gastouse máis do dobre do que se quere gastar agora en Burgos no Castro Tecnolóxico e no Lalín Arena e non pasou nin está a pasar nada, salvo a cantilena de sempre nos bares; pouco máis.

para quen considera que os cidadáns debemos velar polos nosos intereses e tomar medidas cando non se respectan e se atenden, cando o poder nos ‘desconsidera’, Gamonal é boa nova. En Lalín, en cambio, inda queda moito que facer; neste sentido case todo. Logo da ‘espectacular’ cabalgata de Reis oínlle dicir a alguén que en Lalín non había ‘músculo’ social. Habería que comezar por aí.

aquí o PP funciona como unha máquina perfectamente engraxada que leva anos tapando ‘ocos’ cun enorme éxito; entre outras cousas, porque sempre había algo para todos. Nas casas decide o patriarca e o patriarca é popular e fiel á palabra dada. En Lalín opinar non é ben visto; protestar en público é cousa dos outros.

sen embargo, ultimamente os erros de planeamento e xestión (iso de ‘facendo cidade’) son máis que evidentes e a cousa empeza a escasear: para algúns xa non queda. Chegou a crise. Lalín está morrendo e morrerá de todo se non se repensa a si mesmo a partir do que si hai e si somos.

saíron mal os ‘plans parciais’, saíu mal o planeamento e execución de Parking e Praza Europa, saíu mal o Concello Novo, saíu mal o Lalín Arena. Pero ou estes de Gamonal son moi moi ‘tiquismiquis’ ou aquí somos excesivamente compracentes, por dicir algo livián.

non sei moi ben que pensar. Ou si. Por certo, seica imos ‘investir’, ou xa o fixemos, medio millón de euros no Pazo de Liñares. A ver que réditos tiramos.

texto publicado en Faro de Vigo (Deza Tabeirós), o 17 de xaneiro de 2014