 |
| onosolar.net |
PROPOSICIÓN DE LEI, POR INICIATIVA LEXISLATIVA POPULAR, DE MEDIDAS PARA RESTITUÍR
OS DEREITOS LABORAIS, PROFESIONAIS E RETRIBUTIVOS DO PROFESORADO E MELLORAR A
CALIDADE DO ENSINO EN GALIZA
EXPOSICIÓN DE MOTIVOS
A crise económica foi utilizada como
pretexto para acometer graves ataques contra o ensino público, reducindo os
seus orzamentos e acrecentando a súa privatización e mercantilización.
Desmanteláronse os avances que se foran conquistando e a política educativa
encamiñouse a recortar e a reducir a calidade do ensino público, pondo en tea
de xuízo o dereito á educación e desterrando a igualdade de oportunidades.
Asistimos a un permanente ataque ao ensino público e ao desprestixio do
profesorado, mentres se reforzaban e ampliaban os concertos educativos,
mantíñanse os dos centros que segregan o alumnado por razón de xénero e
perpetuábanse diferentes mecanismos para desviar o alumnado e o diñeiro público
ao ensino concertado.
O profesorado viu minguados os seus
dereitos laborais, salariais e profesionais. Os seus salarios foron reducidos
en máis dun 20%, elimináronlle e reducíronlle as pagas extraordinarias,
descontáselle parte do seu salario ao enfermar, suprimíronse as licenzas por
estudo, ampliouse o horario lectivo e foi abrigado a realizar funcións alleas á
súa profesión, como vixiar o alumnado que utiliza o transporte escolar. Entre
outras medidas, a Consellaría eliminou unilateralmente os acordos asinados coas
organizacións sindicais.
Durante estes últimos anos,
constatouse a supresión de numerosas unidades no ensino público,
incrementáronse as ratios e os agrupamentos do alumnado de diferentes idades e
niveis educativos, numeroso alumnado de formación profesional non pode estudar
o ciclo formativo de FP que desexaría e máis de 4000 familias non teñen praza
para os seus fillos e filias no primeiro ciclo de educación infantil en centros
públicos. A supresión de prazas de profesorado é unha constante. Os cadros de
persoal reducíronse en máis de 3000 docentes, impedindo así a adecuada atención
á diversidade e ao alumnado con necesidades específicas de apoio educativo. A
oferta de emprego público desapareceu ou foi insignificante, se ternos en conta
os milleiros de profesores e profesoras que se xubilaron nestes últimos anos.
Cada vez é máis o profesorado que ten que impartir materias das cales non é
especialista, co deterioro correspondente da calidade de ensino.
Durante estes anos, lexislouse en
sentido adverso á consecución dunha educación inclusiva e equitativa.
Desterrouse a igualdade de oportunidades e a educación non permitiu eliminar as
desigualdades sociaIs e funcionar como elemento de cohesión social. Así por
exemplo, o Decreto de creación de centros plurilingües, o Decreto de admisión
de alumnado, o Decreto de comedores e a supresión da gratuidade dos libros de
texto supuxeron discriminacións e acrecentaron as desigualdades. A supresión da
gratuidade do uso do comedor para o alumnado con dereito ao transporte escolar,
e o incremento desorbitado dos prezos agudizaron, máis aínda, a marxinación de
amplas capas sociais en momentos de crise como o actual.
Este panorama involutivo e de
recortes constantes no ensino público en galiza agrávase agora coa aprobación
da Lei orgánica para a mellora da calidade educativa (LOMCE). Trátase dunha
contrarreforma que impregna todo o sistema educativo dos principios que
sustentan a ideoloxía neoliberal, que españoliza aínda máis o sistema
educativo, afonda na confesionalidade, conforma un sistema educativo máis
selectivo e clasista, segrega o alumnado, desconsidera o profesorado, elimina a
xestión democrática dos centros, mercantiliza a educación, garante o dereito do
alumnado a non recibir aulas no noso idioma e nega o dereito a un ensino galego
e laico. Proxecta un ensino orientado cara ao éxito escolar só para o alumnado
con maiores facilidades económicas e sen carencias na aprendizaxe e conduce o
alumnado das clases sociais populares ao fracaso escolar. Cómpre, mentres non
se derrogue a LOMCE, procurar que a súa aplicación sexa o menos nociva posíbel
para o ensino público en Galiza; por iso se propoñen diferentes proposicións
encamiñadas a evitar a súa aplicación, co obxecto de facilitar un ensino máis
equitativo e ao servizo de todas as galegas e galegos.
O vixente Decreto 7912010, do 20 de
maio, para o plurilingüismo no ensino non universitario de Galiza, atenta
abertamente contra o proceso de normalización lingüística e significa unha
involución manifesta para o noso idioma, malia a xa cativa presenza do ensino
en galego. Desterrou o ensino no noso idioma na educación infantil nos ámbitos
español-falantes e prohibiu a ensinanza en galego das materias
técnico-científicas que poderán ser impartidas en inglés. A Xunta de Galiza non
atendeu as recomendacións da diferentes organizacións de todos os ámbitos da
sociedade e de institucións como o Consello Escolar de Galiza, a Real Academia
Galega, o Consello da Cultura e as Universidades para que se derrogase o
decreto e se retomase o Plan Xeral de Normalización da lingua galega, aprobado
por unanimidade no Parlamento de Galiza no ano 2004. Malia ter sido anulado
xudicialmente nalgúns dos seus aspectos máis regresivos, o actual Decreto de
plurilingüismo supón unha verdadeira ameaza para o futuro normalizador da
lingua galega e non garante a competencia do alumnado para o seu uso. Mais a
persecución do noso idioma non se centra exclusivamente na aplicación desde
decreto, senón en toda a política lingüística da Xunta de Galiza. Suprimiuse a
obriga de, como mínimo, realizar unha das probas en galego para acceder á
función pública, desmantelouse o modelo de educación infantil das Galescolas,
os orzamentos dedicados á lingua galega decreceron en máis do 70% desde o ano
2009, reducíronse as axudas aos equipos de normalización, despediuse o
profesorado que impartía os cursos preparatorios para presentarse aos Celga,
etc. Imponse, por tanto, derrogar o Decreto 7912010, do 20 de maio, e pór en
marcha o Plan Xeral de Normalización da lingua galega, conxuntamente con
diferentes medidas que promovan e potencien o ensino en galego, co obxecto de
conseguir a plena normalización da nosa lingua.
Cómpre recuperar e restituír todos
os dereitos laborais, salariais e profesionais que lle foron arrebatados ao
profesorado durante estes anos, así como recoñecer e valorar a función docente,
reforzar o marco galego de negociación e negociar un estatuto do profesorado
galego.
Hai que planificar un sistema
educativo galego en función das nosas necesidades e intereses, enraizado na
nosa realidade nacional, que garanta un sistema educativo universal,
imprescindíbel para conseguir unha sociedade máis xusta e democrática que
asegure unha educación pública de calidade, baluarte dun ensino científico e
laico. Para ¡so, é crucial a elaboración dunha leí do sistema educativo galego
que asegure servizos complementarios e actividades extraescolares en todos os
niveis, o financiamento necesario, a redución das ratios e recursos e
profesorado suficiente. Un sistema educativo que facilite os recursos
compensatorios necesarios para conseguir a igualdade de oportunidades, que
forme cidadáns e cidadás libres e solidarias, unha educación ao servizo dos
galegos e galegas e da transformación social para acadar un ensino unicamente
público, galego, laico e democrático.
TÍTULO 1. DISPOSICIÓN XERAIS
Artigo 1. Fomento
do sistema educativo galego.
1. O Goberno galego elaborará un
proxecto de lei de educación de Galiza, en función das nosas necesidades e
intereses e de acordo coa nosa realidade social, cultural, económica e
lingüística. Asegurará o dereito universal de todos e todas as galegas a unha
educación pública.
2. O Goberno galego ofertará un
número de prazas suficiente en todos os niveis educativos dos centros públicos
e garantirá que todos estes centros conten coa dotación de recursos materiais e
humanos e de profesorado suficiente en todas as especialidades para asegurar
unha calidade educativa para todos e todas.
3. O Goberno galego instará o
Goberno estatal para que modifique a lexislación educativa actual, co obxecto
de promover a eliminación dos concertos educativos e prohibilos en centros que
segregan alumnado por razón de xénero.
4. O Goberno galego instará o
Goberno estatal a derrogar a Lei orgánica para a mellora da calidade educativa
(LOMCE), co obxecto de asegurar un ensino público, galego, laico, coeducativo e
democrático.
5. A Xunta de Galiza instará o
Goberno estatal para que modifique a lexislación básica, co fin de facilitar un
ensino laico, no cal a difusión da fe relixiosa e a materia de relixión non
forme parte do currículo escolar.
6. A Xunta de Galiza restituirá, en
aplicación da presente Lei, os dereitos laborais e salariais dos docentes e
garantirá unha dotación suficiente na educación pública para facer real e
efectivo o dereito universal e gratuíto a unha educación pública e de calidade.
TÍTULO II. DEREITOS LABORÁIS E PROFESIONAIS DO PROFESORADO
Artigo 2.
Recoñecemento do traballo do profesorado.
1. A administración educativa galega
elaborará, previa negociación coas organizacións sindicais, un estatuto galego
da función pública docente.
2. O Goberno galego garantirá a
negociación, no ámbito da Mesa Sectorial Docente non Universitaria, de todas as
cuestións relacionadas coa profesión e coas condicións de traballo dos e das
docentes. Con ese obxecto, promoverase un acordo-convenio para todo o
profesorado galego.
3. O profesorado non impartirá
materias das cales non sexa especialista, sen que isto supoña diminución das
súas retribucións.
4. A Consellaría de Educación
restabelecerá a aplicación do acordo asinado no ano 2007, entre a Consellaría e
todas as organizacións sindicais con presenza na Mesa Sectorial Docente non
Universitaria, que estabelece os criterios para fixar os cadros de persoal dos
centros que imparten ensinanzas de infantil e/ou primaria e o horario do
profesorado destes niveis.
5. A custodia do alumnado, no
período de tempo que transcorre desde a chegada do alumnado transportado e o
inicio da actividade lectiva e desde que remata a actividade escolar até a
saída do transporte escolar, será atendida por persoal específico non docente,
por non seren estas funcións propias do profesorado.
6. A Xunta de Galiza instará o
Goberno estatal a facilitar e gratificar a xubilación anticipada do profesorado
que teña feitos 60 anos de idade e 25 anos de servizo ou que teña realizados 35
anos de servizo, coa finalidade de facilitar a incorporación de novo persoal ao
ensino, crear emprego e recoñecer o traballo docente.
Artigo 3.
Recuperación dos salarios do profesorado.
1. O Goberno galego instará o
Goberno do Estado a derrogar a lexislación que reduciu o salario do
profesorado.
2. A Xunta de Galiza tomará as
medidas necesarias para restabelecer os salarios e as pagas extras completas do
profesorado, que lle foron reducidas desde o mes de xuño de 2010, coa súa
correspondente actualización, segundo o IPC resultante desde o ano 2010 até
hoxe.
3. A Xunta de Galiza garantirá a
cláusula de revisión salarial para garantir, como mínimo, a suba anual dos
salarios do profesorado igual ao IPC.
4. Restabelecerase o acordo entre a
Xunta e as organizacións sindicais para que se destine o 1 % da masa salarial
do Capítulo 1 dos orzamentos da Xunta de Galiza ao Fondo de Acción Social.
5. O profesorado percibirá o 100% de
todas as retribucións desde o primeiro día de incapacidade temporal (IT).
Artigo 4. Creación de emprego.
1. Convocaranse ofertas amplas de
emprego no ensino para dar resposta ás necesidades dos centros e para rematar
coa precariedade e temporalidade do profesorado.
2. Suprimirase o límite da taxa de
reposición do 10% das vacantes existentes. A administración educativa ofertará,
como mínimo, todas as vacantes producidas e creará as necesarias para unha
atención educativa de calidade.
3. A Xunta de Galiza dotará todos os
centros de persoal administrativo, educadores e educadoras sociais e coidadores
e coidadoras, así como doutros perfís profesionais, onde sexa necesario.
4. O profesorado con cinco meses de
servizo no curso escolar terá dereito a percibir as retribucións dos meses de
vacacións escolares do verán.
Artigo 5. Horario
do profesorado e xornada lectiva.
1. Estabelecerase unha xornada
laboral de 35 horas para todo o profesorado, das cales 30 horas serán de
dedicación ao centro e 18 períodos de 50 minutos, como máximo, serán lectivos.
2. Garantirase a redución do horario
lectivo do profesorado maior de 55 anos. Este profesorado poderá acollerse á
redución do seu horario lectivo, sen redución das súas retribucións.
3. Durante os meses de xuño e
setembro, os centros que imparten ensinanzas de infantil e/ou de primaria
estabelecerán unha xornada matinal reducida de catro horas.
Artigo 6. Formación do profesorado.
1. A Consellaría de Educación
facilitará e garantirá o dereito á formación continua de todo o profesorado.
Con este fin, previa negociación coas organizacións sindicais, elaborará plans
anuais de formación que facilitarán unha formación descentralizada e gratuíta,
en horario lectivo e laboral, que abranguerá todas as áreas do currículo e
procurará a renovación e innovación educativa e unha mellor formación didáctica
e pedagóxica.
2. A formación do profesorado será
nucleada polos propios centros educativos, promoverá a normalización e
galeguización do ensino e terá como obxecto capacitar plenamente o profesorado
para impartir a súa materia en galego e conseguir actitudes favorábeis ao
ensino no noso idioma.
Artigo 7. Saúde
laboral.
1. O Goberno galego recoñecerá as
enfermidades profesionais dos e das docentes e porá en práctica no ensino os
dereitos contemplados na Lei de prevención de riscos laborais como a avaliación
dos riscos laborais inherentes á profesión docente.
2. Promoverase que o profesorado
que, por motivos de saúde, vexa minguada a súa capacidade para a docencia,
poida reducir o seu horario lectivo e realizar actividades non directamente
docentes.
Artigo 8.
Eleccións por centro de traballo
A administración educativa promoverá
eleccións sindicais por centro escolar, de tal maneira que todos e cada un dos
centros públicos con máis de 6 docentes elixan os seus representantes
sindicais.
TÍTULO III. DEFENSA DO ENSINO PÚBLICO COMO GARANTE DA IGUALDADE DE
OPORTUNIDADES.
Artigo 9.
Melloras na calidade do ensino.
1. A Xunta de Galiza reducirá as
ratios actuais de alumnado por aula, fixará como ratio máxima de alumnado por
aula no primeiro ciclo de educación infantil 6 alumnos/as na idade de 0 a 1
anos, de 10 alumnos/as na idade de 1 ano e de 12 na idade de 2 anos. No segundo
ciclo de educación infantil, o máximo de alumnos e alumnas por aula será de 15.
Na educación primaria, educación secundaria obrigatoria, na formación
profesional e nas e escolas oficiais de idiomas, a ratio máxima de alumnado por
aula estabelecerase en 20. No bacharelato, a ratio máxima será de 25 alumnos/as
por aula. Todas estas ratios veranse reducidas naqueles grupos que escolaricen
alumnado con necesidades específicas de apoio educativo, e o alumnado repetidor
terase en conta para a conformación dos grupos.
2. O Goberno galego garantirá unha
oferta suficiente de prazas públicas de educación infantil de 0-3 anos para
satisfacer a demanda existente.
3. O Goberno galego estabelecerá un
plan orzamentario, co obxecto de dedicar o 7% do PIB galego á educación galega.
4. O Goberno galego elaborará un
plan de actuación preferente destinado a combater o fracaso escolar e o
abandono na escolarización temperá, garantindo unha adecuada atención á
diversidade, apoio e reforzo educativo, atención personalizada e unha
escolarización adecuada para o alumnado con necesidades específicas de apoio
educativo. Reforzará a titoría e a orientación e apostará por un modelo
educativo máis social e igualitario.
5. O Goberno galego suprimirá o
actual sistema de xestión de calidade e abrirá un amplo debate, coa
participación do profesorado, sobre a avaliación do sistema educativo.
6. A Consellaría de Educación
garantirá a cobertura inmediata de todas as baixas laborais que se produzan,
nomeando un ou unha docente substituta.
Artigo 10.
Formación profesional.
1. A Xunta de Galiza promoverá unha
nova planificación da formación profesional que suprima os concertos educativos
co ensino privado. Diversificará e asegurará unha oferta suficiente na rede
pública para satisfacer a demanda existente e atender as necesidades do tecido
industrial e dos sectores estratéxicos da nasa economía, contribuíndo así a
fomentar e a desenvolver as nosas potencialidades económicas.
2. O Goberno galego instara o
Goberno central a derrogar a lexislación respecto ao funcionamento dos centros
integrados para garantir a xestión e a elección democrática dos cargos
directivos.
Artigo 11.
Escolas oficiais de idiomas.
1. O Goberno galego estenderá a rede
das escolas oficiais de idiomas, mediante a creación de novos centros e da
ampliación dos existentes.
2. As escolas oficiais de idiomas
serán as certificadoras oficiais de referencia do coñecemento das linguas, para
evitar as privatizacións neste campo.
3. A Consellaría de Educación
negociará coa Mesa Sectorial Docente non Universitaria un novo regulamento
orgánico das EEOOII que contemplará un horario lectivo do profesorado, cunha
asignación máxima de 3 grupos de 5 horas lectivas e 3 horas complementarias por
profesor ou profesora.
Artigo 12.
Ensinanzas artísticas superiores.
A Xunta de Galiza arbitrará os
mecanismos necesarios para que os centros que imparten as ensinanzas artísticas
superiores poidan adscribirse á Universidade, co fin de que o alumnado obteña a
titulación de grao e para a integración total destes estudos na Universidade.
Artigo 13.
Escolarización no medio rural.
O Goberno galego garantirá e
facilitará a escolarización no medio rural. Con esa finalidade, elaborarase un
mapa escolar do ámbito rural que garanta a escolarización dos nenos e nenas na
súa contorna, o mantemento das escalas unitarias e uns cadros de persoal
específicos, así como transporte e comedor para o alumnado que o necesite, con
equipamento suficiente e adecuado, para garantir a mesma calidade e recursos
que no resto dos centros.
Artigo 14. Libros
de texto e material didáctico gratuíto.
A Xunta de Galiza garantirá a todo o
alumnado do ensino de educación infantil, primaria e ESO a gratuidade dos
libros de texto e do material didáctico que se empregue nas aulas.
Os centros serán dotados con libros
e material didáctico en galego aplicábel ás diferentes áreas.
A administración educativa garantirá a publicación de
libros de texto e de materiais en galego para todas as materias e módulos
profesionais.
Artigo 15.
Xestión democrática dos centros.
A Consellaría de Educación garantirá
a xestión democrática dos centros, mediante a elección democrática e directa
das direccións polo Consello Escolar, promovendo o traballo en equipo e a
decisión colexiada nos órganos de goberno.
TÍTULO IV. SERVIZOS COMPLEMENTARIOS E ACTIVIDADES EXTRAESCOLARES.
Artigo 16.
Dereito ao comedor escolar.
1. O alumnado escolarizado no ensino
público de Galiza terá dereito a facer uso do servizo de comedor escolar. O servizo
de comedor estará atendido por persoal específico non docente, dependente da
administración e coa cualificación correspondente.
2. Os centros que escolaricen alumnado
dos niveis educativos gratuÍtos e non conten con servizo de comedor realizarán
as reformas e actuacións necesarias para garantir a oferta deste servizo.
3. O alumnado que teña que facer
uso do transporte escolar para a súa escolarización terá acceso gratuíto ao
comedor escolar.
4. A Xunta de Galiza fixará uns
prezos módicos para o resto do alumnado, co obxectivo de conseguir o acceso
gratuíto para todo o alumnado do ensino básico.
Artigo 17.
Actividades extraescolares.
O Goberno galego facilitará unha
oferta ampla e variada a todos os centros públicos de actividades
extraescolares gratuítas que serán impartidas por persoal específico e
cualificado dependente da propia administración. A administración garantirá o
transporte público para a realización destas actividades.
Artigo 18.
Transporte escolar.
1. A Xunta de Galiza elaborará unha
lei do transporte escolar de Galiza para garantir este dereito en todos os
niveis educativos, nomeadamente nas zonas rurais que non contan con transporte
público regular. A organización e a regulación dos itinerarios ou itinerarios
multicentros non poden condicionar o horario e a xornada dos centros.
2. A Consellaría de Educación
derrogará a Lei 5/2009 de medidas urxentes para a modernización do sector do
transporte público de Galiza que estabelece, de xeito xeneralizado, o
incremento dun 20% do custe do contrato do transporte no caso de que o centro
mude de xornada partida a continuada.
3. A Consellaría de Educación dotará
persoal para custodiar o alumnado nas agardas, desde a chegada do transporte
escolar até o inicio das clases e desde o remate até a saída do transporte.
TÍTULO V. GALEGUIZACIÓN DO ENSINO E NORMALIZACIÓN LINGÜÍSTICA
Artigo 19.
Fomento da lingua galega e galeguización dos contidos educativos.
1. A Xunta de Galiza aplicará no
ámbito do ensino, con carácter de mínimos, o Plan xeral de normalización
lingüística, aprobado no Parlamento de Galiza no ano 2004, no camiño de
conseguir a plena normalización lingüística e un ensino totalmente en galego.
2. A administración educativa fixará
uns currículos escolares inseridos na nosa realidade nacional, con contidos
propios, nos que Galiza sexa materia de estudo en toda a súa dimensión
histórica, cultural, social e económica, é dicir, que teña como principio o coñecemento
e a valoración de todo o que nos conforma como pobo.
3. A administración educativa
estabelecerá plans de formación para o conxunto do profesorado, a fin de
alcanzar a plena normalización lingüística, que constarán, como mínimo, de
formación específica en cada materia do currículo e deberán ser instrumento de
capacitación do profesorado para dar aulas en galego e de dinamización do uso
da lingua galega como lingua de docencia.
4. Nos procesos selectivos e de
acceso á función pública docente, o profesorado deberá ter competencia en
lingua galega e estará obrigado a realizar, como mínimo, unha das probas en
lingua galega.
Disposición
derrogatoria primeira. Derrogación normativa.
Fican derrogadas as seguintes
disposicións normativas naqueles aspectos que se opoñan ou contradigan ao
disposto na presente lei:
- Decreto 79/2010, do 20 de maio,
para o plurilingüismo no ensino non universitario de Galiza.
- Decreto 74/2011, do 14 de abril,
polo que se regula a formación permanente do profesorado que imparte as
ensinanzas estabelecidas na Lei orgánica de educación (LOE).
- Orde de 23 de xuño de 2011 pola
que se regula a xornada de traballo do persoal funcionario e laboral docente
que imparte as ensinanzas reguladas na Lei orgánica 2/2006, do 3 de maio, de educación.
(DOG 30/06/2011)
- Lei 4/2011, do 30 de xuño, de
convivencia e participación da comunidade educativa. (DOG 15/07/2011)
- Lei 1/2012, do 29 de febreiro, de medidas temporais en
determinadas materias do emprego público da Comunidade Autónoma de Galiza. (DOG
0210312012)
- Orde do 4 de xuño de 2012 pola que
se modifica o artigo 4 da Orde do 23 de xuño de 2011 pola que se regula a
xornada de traballo do persoal funcionario e laboral docente que imparte as
ensinanzas reguladas na Lei orgánica 2/2006, do 3 de maio, de educación.
- Decreto 254/2012 do 13 de
decembro, polo que se regula a admisión de alumnado en centros docentes
sostidos con fondos públicos que imparten as ensinanzas de segundo ciclo de
educación infantil, de educación primaria, de educación secundaria obrigatoria
e de bacharelato reguladas na Lei orgánica 212006, do 3 de maio, de educación.
(DOG 26/12/2012)
- Decreto 132/2013, do 1 de agosto,
polo que se regulan os comedores escolares dos centros docentes públicos non
universitarios dependentes da consellería con competencias en materia de
educación.
Disposición
derrogatoria segunda.
O Goberno galego instará o Goberno central a derrogar as
seguintes normas:
- Real decreto lei 14/2012, do 20 de
abril, de medidas urxentes de racionalización do gasto público no ámbito
educativo.
- Real decreto lei 20/2012, do 13 de
xullo, de medidas para garantir a estabilidade orzamentaria e de fomento da
competitividade, en materia de emprego público.
- Lei 912012, do 3 de agosto, de
adaptación das disposicións básicas do Real decreto le¡ 2012012, do 13 de
xullo, de medidas para garantir a estabilidade orzamentaria e de fomento da
competitividade, en materia de emprego público.
Disposición
derradeira única. Entrada en vigor.
